प्रसौनी–२ मा घटस्थापनादेखि सप्तमीसम्म मासु तथा माछा पसल बन्द गर्न आग्रह
कोल्हवी न्यूज
बारा । बडादशैंलाई लक्षित गर्दै बाराको प्रसौनी गाउँपालिका–२ वडा कार्यालयले प्रसौनी चौक तथा बजार क्षेत्रमा सञ्चालित मासु तथा माछा पसलहरू बन्द गर्न आग्रह गरेको छ ।
वडा कार्यालयले असोज २२ गते जारी गरेको सूचनामार्फत घटस्थापनादेखि सप्तमीसम्म प्रसौनी चौक र बजार क्षेत्रमा रहेका सम्पूर्ण मासु तथा माछा पसल बन्द गर्न व्यवसायीलाई अनुरोध गरेको हो ।
वडामा दुर्गा पूजा सञ्चालन भइरहेको तथा दशैं पर्वलाई मध्यनजर गर्दै धार्मिक तथा सामाजिक वातावरणलाई व्यवस्थित बनाउन उक्त अवधिमा पसल बन्द गर्न आग्रह गरिएको सूचनामा उल्लेख छ ।
वडा कार्यालयले जारी गरेको सूचनामा तोकिएको अवधिमा पसल बन्द नगरे कानुनबमोजिम कारबाही गरिने चेतावनीसमेत दिइएको छ ।
सूचनाको कार्यान्वयन तथा सुरक्षा व्यवस्थाका लागि प्रसौनी गाउँपालिकाको कार्यालय र इलाका प्रहरी कार्यालय प्रसौनी, नौतनलाई समेत बोधार्थ पठाइएको छ ।
वडा अध्यक्ष हृदय कुमार साह तेलीले जारी गरेको सूचनामार्फत दशैं पर्वलाई व्यवस्थित, शान्तिपूर्ण तथा मर्यादित बनाउन स्थानीय व्यवसायीलाई सहयोग गर्न आग्रह गरिएको हो।
सम्बन्धित खबरहरु
