बारा सिम्रौनगढको साम्राज्य किन देखिदैन पर्यटन बजारमा

अशेष ढुंगाना,कोल्हवी। ऐतिहासिक, धार्मिक तथा पुरातात्त्विक महत्व बोकेको बाराको सिम्रौनगढलाई पर्यटनको महत्वपूर्ण गन्तव्यका रूपमा प्रवर्द्धन गर्नुपर्ने आवश्यकता देखिएको छ। प्राचीन इतिहास, कला, संस्कृति र पुरातात्त्विक सम्पदाले समृद्ध सिम्रौनगढलाई व्यवस्थित रूपमा पर्यटन बजारमा लैजान सके स्थानीयस्तरमा आर्थिक गतिविधि बढाउन सकिने सम्भावना रहेको छ।

सिम्रौनगढमा रहेका ऐतिहासिक तथा पुरातात्त्विक संरचना, मठमन्दिर, कलात्मक वास्तुकला र आसपासको प्राकृतिक वातावरणले पर्यटकलाई आकर्षित गर्न सक्ने आधार तयार गरेका छन्। तर पर्याप्त प्रचार–प्रसार, पूर्वाधार विकास तथा संरक्षणको अभावमा यसको पर्यटन सम्भावना अपेक्षाकृत रूपमा उजागर हुन सकेको छैन।

पर्यटन बजारमा सिम्रौनगढलाई स्थापित गर्न ऐतिहासिक सम्पदाको संरक्षणसँगै सडक, यातायात, खानेपानी, सरसफाइ, सूचना केन्द्र, पर्यटक विश्रामस्थल तथा स्थानीय उत्पादनको प्रवर्द्धनमा ध्यान दिनुपर्ने देखिन्छ। साथै सिम्रौनगढको इतिहास र पुरातात्त्विक महत्वबारे देश तथा विदेशमा प्रचार गर्न सके आन्तरिक तथा बाह्य पर्यटकको आकर्षण बढाउन सकिने अपेक्षा गरिएको छ।

सिम्रौनगढको पर्यटन विकासले स्थानीय समुदायको आयआर्जनमा समेत योगदान पुर्‍याउन सक्छ। स्थानीयस्तरमा होमस्टे, होटल तथा रेस्टुरेन्ट, हस्तकला, स्थानीय परिकार, कृषि उत्पादन र अन्य पर्यटकीय सेवाको विकास गर्न सके पर्यटनबाट रोजगारी सिर्जना हुने सम्भावना छ।

ऐतिहासिक सम्पदालाई केवल पुराना संरचनाका रूपमा संरक्षण गर्नेभन्दा त्यसलाई पर्यटन, स्थानीय अर्थतन्त्र र सांस्कृतिक पहिचानसँग जोडेर अघि बढाउनुपर्ने आवश्यकता छ। सम्बन्धित तीनै तहका सरकार, स्थानीय समुदाय, पर्यटन व्यवसायी तथा सरोकारवाला निकायबीच समन्वय हुन सके सिम्रौनगढलाई मधेश प्रदेशकै महत्वपूर्ण पर्यटकीय गन्तव्यका रूपमा विकास गर्न सकिने आधार रहेको छ।

सिम्रौनगढको इतिहास, सम्पदा र संस्कृति संरक्षण गर्दै त्यसलाई पर्यटन बजारसँग जोड्न सके स्थानीय विकाससँगै बारा  क्षेत्र न.१को आर्थिक गतिविधिमा समेत सकारात्मक प्रभाव पार्न सक्ने देखिन्छ।

यस सम्बन्धमा बारा १ का सान्सद गणेश धिमालले केही समय अघि मात्र सदनमा यसको संरक्षण,प्रवर्द्धन र पर्यटन बजारको रुपमा राजयले उचित ध्यान दिनु पर्नेमा जोड दिदै आवाज उठाउनु भएको थियो।