मुन्ना कन्स्ट्रक्सनद्वारा ईप्रका कटहरियामा १० लाखभन्दा बढीको लगानीमा पूर्वाधार निर्माण
कोल्हवी न्यूज
रौतहट,रौतहटको कटहरियास्थित इलाका प्रहरी कार्यालय (ईप्रका) को प्राङ्गणमा शौचालय, स्नानघर तथा कार्यालय भवनदेखि बाहिरी सडकसम्म २० फिट कालोपत्रे गर्ने काम व्यक्तिगत लगानीमा सुरु गरिएको छ।
मुन्ना कन्स्ट्रक्सन कटहरिया–४ का अध्यक्ष प्रमोद प्रसाद यादवले वरिष्ठ प्रहरी नायब निरीक्षक (वरिष्ठ सई) जयप्रकाश साहको विशेष अनुरोधमा उक्त निर्माण कार्य अघि बढाएका हुन्।
निर्माण व्यवसायी यादवले करिब १० लाख रुपैयाँभन्दा बढीको व्यक्तिगत लगानीमा यी संरचना निर्माण गर्न लागेको बताएका छन्।यसबाट लामो समयदेखि आधारभूत पूर्वाधारको अभाव झेल्दै आएका प्रहरी कर्मचारी तथा सेवाग्राहीलाई राहत पुग्ने अपेक्षा गरिएको छ।
कार्यालयमा छुट्टै शौचालयको व्यवस्था नहुँदा कार्यालय प्रमुख वा उनका परिवारका सदस्य आउँदासमेत प्रहरी जवानहरूले प्रयोग गर्ने शौचालयमा लाइन बस्नुपर्ने बाध्यता रहेको थियो। त्यस्तै, कार्यालय भवनदेखि बाहिरी पक्की सडकसम्म व्यवस्थित बाटो नहुँदा वर्षायाममा हिलोमय बाटो भएर आवतजावत गर्नुपर्ने समस्या प्रहरी कर्मचारी र सेवाग्राहीले भोग्दै आएका थिए।
नयाँ शौचालय र स्नानघर निर्माण तथा सडक कालोपत्रे भएपछि कार्यालयको सरसफाइ, कर्मचारीको दैनिक कार्यसम्पादन र सेवाग्राहीको आवागमनमा सहजता आउने विश्वास गरिएको छ। विशेषगरी प्रहरी कार्यालयजस्तो सार्वजनिक सेवा प्रवाह हुने निकायमा शौचालय, स्नानघर र व्यवस्थित प्रवेशमार्गजस्ता आधारभूत सुविधा हुनु आवश्यक मानिन्छ।
प्रहरी कार्यालयमा आवश्यक पूर्वाधार निर्माणका लागि निजी क्षेत्रबाट गरिएको यो सहयोग प्रशंसनीय छ। सार्वजनिक सेवामा खटिने प्रहरी कर्मचारीको कार्यवातावरण सुधार्नुका साथै नागरिकलाई सहज सेवा उपलब्ध गराउन यस्ता पहलले सहयोग पुर्याउन सक्छन्।
कटहरियामा सुरु भएको यो निर्माण कार्यलाई सहयोगको उदाहरणका रूपमा मात्र नभई सार्वजनिक कार्यालयका आधारभूत आवश्यकता समयमै पूरा गर्नुपर्ने सन्देशका रूपमा पनि लिन सकिन्छ।
निर्माण कार्यमा सहयोग पुगेको भन्दै इलाका प्रहरी कार्यालयका कर्मचारीहरूले निर्माण व्यवसायी यादवप्रति आभार व्यक्त गरेका छन्।
सम्बन्धित खबरहरु
