बारम्बार बेहोस हुनु सामान्य होइन, यी रोगको संकेत हुन सक्छ

बारम्बार बेहोस हुने समस्यालाई धेरैले कमजोरी, भोक वा थकानका कारण ठानेर बेवास्ता गर्छन्। तर, स्पष्ट कारणबिना पटक–पटक बेहोस हुनु मस्तिष्क, मुटु वा स्नायु प्रणालीसँग सम्बन्धित समस्याको संकेत हुन सक्छ।

डिहाइड्रेसन, कम रक्तचाप, भोक, अत्यधिक गर्मी, पीडा वा भावनात्मक तनावका कारण पनि बेहोस हुन सकिन्छ। यस्तो अवस्थालाई सामान्यतः ‘भासोभागल सिन्कोप’ भनिन्छ।

तर, व्यायाम गर्दा बेहोस हुनु, अचानक कुनै चेतावनीबिना बेहोस हुनु, लामो समयसम्म होस नआउनु, छाती दुख्नु, मुटुको धड्कन अनियमित हुनु वा बेहोस भएपछि बोल्न गाह्रो हुने तथा शरीरको कुनै भाग कमजोर हुनेजस्ता लक्षण देखिएमा गम्भीर रूपमा लिनुपर्छ।

विशेषज्ञहरूका अनुसार छारे रोग, स्ट्रोक, मस्तिष्कसम्बन्धी समस्या तथा मुटुको धड्कन अनियमित हुने रोगले पनि बारम्बार बेहोस बनाउन सक्छ। त्यसैले यस्तो समस्या दोहोरिरहेमा चिकित्सकसँग परामर्श गरी आवश्यक परीक्षण गराउनु उचित हुन्छ।