अनुहारमा बरफ लगाउनु फाइदाजनक कि हानिकारक? जान्नुहोस् सही तरिका
कोल्हवी न्यूज
एजेन्सी । सामाजिक सञ्जालमा पछिल्लो समय ‘फेस आइसिङ’ अर्थात् अनुहारमा बरफ लगाउने ट्रेन्ड निकै लोकप्रिय बनेको छ। मेकअपबिनै अनुहार चम्किलो, ताजा र सुन्निएको कम देखिने दाबी गरिए पनि विशेषज्ञहरूले यसको प्रयोगमा सावधानी अपनाउन सुझाव दिएका छन्।
बरफले केही समयका लागि छालालाई चिसोपन दिई सुन्निएको कम गर्ने, पोर्स कसिएको जस्तो देखाउने र अनुहारलाई ताजा देखाउन मद्दत गर्न सक्छ। यही कारण धेरैले मेकअपअघि वा बिहान उठ्नेबित्तिकै फेस आइसिङ गर्ने गरेका छन्। तर यसको प्रभाव अस्थायी मात्र हुने चिकित्सकहरू बताउँछन्।
विशेषज्ञका अनुसार बरफलाई सिधै छालामा लगाउनु उपयुक्त हुँदैन। यसो गर्दा छालाको सुरक्षात्मक तह (स्किन ब्यारियर) कमजोर हुने, रातोपन, पोल्ने, जलन तथा सेन्सिटिभिटी बढ्ने जोखिम रहन्छ। त्यसैले बरफलाई सधैं सफा कपडा वा कटनमा बेरेर १–२ मिनेटभन्दा बढी प्रयोग नगर्न सुझाव दिइएको छ।
सेन्सिटिभ, सुख्खा वा डन्डीफोर आउने छाला भएकाहरूले फेस आइसिङ गर्दा अझ बढी सावधानी अपनाउनुपर्ने चिकित्सकहरूको भनाइ छ। रोसासिया, एक्जिमा, डर्माटाइटिस, चिसोबाट एलर्जी हुने वा छालाको उपचार गराइरहेका व्यक्तिका लागि भने यो विधि उपयुक्त नहुन सक्छ।
व्यायामपछि वा घामबाट फर्किएपछि अनुहारलाई शीतल बनाउन चिसो पानीले धुने वा कपडामा बेरेर ‘कोल्ड कम्प्रेस’ प्रयोग गर्नु सुरक्षित विकल्प मानिन्छ। यदि बरफ लगाएपछि छाला अत्यधिक रातो हुने, पोल्ने, चिलाउने, सुन्निने वा र्यास देखिएमा तत्काल प्रयोग बन्द गर्न चिकित्सकहरूले सुझाव दिएका छन्।
छालासम्बन्धी कुनै पनि नयाँ ट्रेन्ड अपनाउनुअघि सामाजिक सञ्जालका टिप्समा मात्र भर नपरी छाला रोग विशेषज्ञ (डर्माटोलोजिस्ट) को सल्लाह लिनु नै सबैभन्दा सुरक्षित उपाय हुने विज्ञहरूको भनाइ छ।
दैनिक भास्कर
