देशभर मनसुन सक्रिय, पहाडमा वर्षा र तराईमा तातो लहरको प्रभाव
कोल्हवी न्यूज
काठमाडौं । देशका विभिन्न क्षेत्रमा मनसुनी प्रणालीको प्रभाव कायम रहँदा आज पनि वर्षा र तातो मौसम दुवैको असर देखिने भएको छ।
मौसम पूर्वानुमान महाशाखाका अनुसार कोशी, मधेस र बागमती प्रदेशका अधिकांश भूभागमा मनसुन सक्रिय रहेको छ भने गण्डकी र लुम्बिनी प्रदेशका केही क्षेत्रमा पनि यसको प्रभाव जारी छ।
महाशाखाले आज हिमाली तथा पहाडी क्षेत्रका केही स्थानमा चट्याङसहित मध्यम वर्षाको सम्भावना रहेको जनाएको छ। साथै, कोशी प्रदेशको तराई, मधेस, बागमती र गण्डकी प्रदेशका तराई क्षेत्रका केही स्थानमा पनि वर्षा हुन सक्ने अनुमान गरिएको छ।
यता लुम्बिनी र सुदूरपश्चिम प्रदेशका तराई भूभागमा तातो लहरको प्रभाव कायम रहने सम्भावना छ। बागमती र गण्डकी प्रदेशका केही तराई क्षेत्रमा समेत अत्यधिक गर्मी महसुस हुन सक्ने मौसमविद्हरूले बताएका छन्।
रातिको समयमा कोशी, बागमती र गण्डकी प्रदेशका पहाडी तथा हिमाली क्षेत्रमा आंशिकदेखि सामान्य बदली रहने तथा केही स्थानमा हल्कादेखि मध्यम वर्षा हुने सम्भावना रहेको महाशाखाको भनाइ छ।
मौसमविद्हरूले वर्षा र चट्याङको जोखिम रहेका क्षेत्रका बासिन्दालाई सतर्कता अपनाउन तथा तातो लहर प्रभावित क्षेत्रमा आवश्यक सावधानी अपनाउन आग्रह गरेका छन्।
