थारु समुदायको आवाज सशक्त बनाउने लक्ष्यसहित नेपाल थारु संघको प्रथम महाधिवेशन आजदेखि

काठमाडौंमा आजदेखि नेपाल थारु संघको पहिलो महाधिवेशन सुरु हुँदैछ। नेपाली कांग्रेसका सभापति गगनकुमार थापा ले ललितपुरको सानेपास्थित नेपाली कांग्रेस केन्द्रीय कार्यालयमा दिउँसो १२:१५ बजे महाधिवेशनको उद्घाटन गर्ने कार्यक्रम छ।

राष्ट्रियता, लोकतन्त्र, समाजवाद तथा थारु समुदायको एकतालाई आधार बनाएर संगठनलाई थप सशक्त बनाउने लक्ष्यसहित महाधिवेशन आयोजना गरिएको हो। थारु समुदायका राजनीतिक, सामाजिक, सांस्कृतिक र आर्थिक सरोकारलाई संस्थागत रूपमा अघि बढाउने विषय पनि महाधिवेशनको प्रमुख एजेन्डा बनेको छ।

महाधिवेशन अवधिभर संगठनको भावी नीति, रणनीति र कार्यक्रममाथि व्यापक छलफल हुने जनाइएको छ। साथै, नयाँ नेतृत्व चयनसँगै थारु समुदायको प्रतिनिधित्व र भूमिकालाई अझ प्रभावकारी बनाउने अपेक्षा गरिएको छ।

देशका विभिन्न जिल्लाबाट आएका सयौँ प्रतिनिधि र कार्यकर्ताको सहभागिताले महाधिवेशनलाई संगठन विस्तार, नेतृत्व हस्तान्तरण र समुदायको साझा आवाज बलियो बनाउने महत्वपूर्ण अवसरका रूपमा हेरिएको छ।