आँप खाँदा साँच्चै डन्डीफोर आउँछ ? विज्ञले खोले भ्रमको रहस्य
कोल्हवी न्यूज
१४ जेठ — गर्मी मौसम सुरु भएसँगै धेरैले सोध्ने प्रश्न हो—“धेरै आँप खाँदा डन्डीफोर आउँछ त ?” यही डरका कारण कतिपय मानिस आँप खानै हिच्किचाउने गर्छन्। तर छाला विशेषज्ञहरूका अनुसार आँपलाई डन्डीफोरको मुख्य कारण मान्नु वैज्ञानिक रूपमा सही होइन।
सुरभी देशपाण्डे का अनुसार डन्डीफोर मुख्यतः हर्मोनल परिवर्तन, चिल्लो छाला, तनाव, निद्राको कमी, असन्तुलित भोजन र सरसफाइको अभावका कारण हुने गर्छ। आँपले सीधै डन्डीफोर निम्त्याउने प्रमाण भने स्पष्ट रूपमा नभएको उनको भनाइ छ।
विशेषज्ञहरूका अनुसार आँपमा भिटामिन ‘ए’, ‘सी’ तथा एन्टिअक्सिडेन्ट प्रशस्त पाइन्छ, जसले छालालाई फाइदा पुर्याउन सक्छ। तर अत्यधिक मात्रामा सेवन गर्दा वा धेरै चिनी भएका डेजर्ट, आइसक्रिम तथा तारेको–भुटेको खानेकुरासँग खाँदा शरीरमा इन्फ्लेमेसन बढ्न सक्छ। त्यसको असर छालामा देखिन सक्ने बताइन्छ।
गर्मी मौसममा पसिना धेरै आउने, अनुहार बारम्बार छुने र सफाइमा बेवास्ता गर्ने कारणले पनि डन्डीफोर बढ्ने सम्भावना हुन्छ। यस्तो अवस्थामा धेरैले दोष भने आँपलाई दिने गर्छन्।
यस्तै, केही व्यक्तिमा आँपको बोक्रामा पाइने ‘उरुसिओल’ तत्वका कारण एलर्जी देखिन सक्छ। यस अवस्थालाई “म्यांगो डर्माटाइटिस” भनिन्छ। यसले अनुहार वरिपरि रातोपन, चिलाउने वा साना दाना ल्याउन सक्छ, जसलाई कतिपयले डन्डीफोर ठान्ने गर्छन्।
विज्ञहरूका अनुसार सामान्य व्यक्तिले दिनमा एउटा सानो आँप खानु सुरक्षित मानिन्छ। मधुमेह भएका व्यक्तिले भने सीमित मात्रामा सेवन गर्नुपर्ने सुझाव दिइएको छ।
स्वास्थ्य विशेषज्ञहरूले आँप खानुअघि राम्ररी धुने, बोक्रा ताछेपछि हात सफा गर्ने र अत्यधिक चिनी भएका प्रोसेस्ड जुसबाट टाढा रहने सल्लाह दिएका छन्।
निष्कर्षतः, सही मात्रा, सरसफाइ र सन्तुलित जीवनशैली अपनाएमा आँप स्वास्थ्यका लागि लाभदायक फल नै मानिन्छ।
