बढ्दैछ मिर्गौला क्यान्सरको जोखिम, यस्ता छन् लक्षण र बच्ने उपाय
कोल्हवी न्यूज
काठमाडौं । पछिल्लो समय नेपालमा मिर्गौलाको क्यान्सरका बिरामीको संख्या बढ्दो क्रममा रहेको चिकित्सकहरूले बताएका छन्। अस्वस्थ खानपान, धुम्रपान, मद्यपान तथा अव्यवस्थित जीवनशैलीका कारण क्यान्सर रोगको जोखिम बढिरहेको जनाइएको छ।
चिकित्सकहरूका अनुसार शरीरका कोषिकाहरू अनियन्त्रित रूपमा बढ्न थालेपछि क्यान्सर रोग विकसित हुन्छ। यही प्रक्रिया मिर्गौलामा हुँदा मिर्गौला क्यान्सर हुने गर्दछ। शरीरका अन्य अंगजस्तै मिर्गौलामा पनि कोषिकाहरू आवश्यकभन्दा बढी विभाजन हुँदा ट्युमर बन्ने र पछि क्यान्सरमा रूपान्तरण हुने सम्भावना रहन्छ।
विश्व स्वास्थ्यसम्बन्धी तथ्यांकअनुसार नेपालमा हरेक वर्ष करिब २० हजार नयाँ क्यान्सरका बिरामी थपिने गरेका छन्। पुरुषमा फोक्सोको क्यान्सर र महिलामा स्तन तथा पाठेघरको क्यान्सर बढी देखिए पनि पछिल्ला वर्षहरूमा मिर्गौला क्यान्सरका बिरामीसमेत बढिरहेका छन्।
विशेषज्ञका अनुसार मिर्गौला क्यान्सर प्रारम्भिक चरणमै पत्ता लागे शल्यक्रियामार्फत उपचार सम्भव हुन्छ। पहिलोदेखि तेस्रो चरणसम्मको क्यान्सरमा मिर्गौलाको प्रभावित भाग हटाउने उपचार प्रभावकारी मानिन्छ। तर चौथो चरणमा क्यान्सर शरीरका अन्य भागमा फैलिने भएकाले विशेष उपचार आवश्यक पर्छ।
अन्य धेरै क्यान्सरमा किमोथेरापी प्रयोग गरिए पनि मिर्गौला, कलेजो र थाइराइड क्यान्सरमा भने ‘टार्गेटेड थेरापी’ प्रभावकारी हुने चिकित्सकहरू बताउँछन्।
मिर्गौला क्यान्सरका प्रमुख लक्षण:
- पिसाबमा रगत देखिनु
- कम्मर वा पेटको एकातिर दुखाइ हुनु
- अनावश्यक रूपमा तौल घट्नु
- लगातार ज्वरो वा खोकी लाग्नु
- अत्यधिक कमजोरी महसुस हुनु
कसरी बच्ने ?
चिकित्सकहरूले मिर्गौला क्यान्सरबाट बच्न स्वस्थ जीवनशैली अपनाउन सुझाव दिएका छन्।
- धुम्रपान र मद्यपान नगर्ने
- नियमित व्यायाम गर्ने
- बोसोयुक्त तथा जंकफुड कम खाने
- पर्याप्त पानी पिउने
- रसायन प्रयोग हुने उद्योग वा कारखानामा काम गर्दा सावधानी अपनाउने
- नियमित स्वास्थ्य परीक्षण गराउने
चिकित्सकहरूका अनुसार समयमै पहिचान र उपचार भए मिर्गौला क्यान्सर निको पार्न सकिने सम्भावना उच्च रहने भएकाले लक्षण देखिए तत्काल स्वास्थ्य परीक्षण गराउन आवश्यक छ।
