तीनकुने प्रदर्शनमा ज्यान गुमाएका पत्रकार रजकको त्रिवि शिक्षण अस्पतालमा पोस्टमार्टम जारी

 काठमाडौंको तीनकुनेमा राजावादीहरूको प्रदर्शनका क्रममा मृत्यु भएका पत्रकार सुरेश रजकको त्रिवि शिक्षण अस्पतालमा पोस्टमार्टम भइरहेको छ।

काठमाडौं जिल्ला प्रहरी परिसरका एसपी अपिल राज बोहराका अनुसार, यसअघि मङ्गलबार साँझ रजकको एक्स-रे गरिएको थियो। शरीरमा गोली लागेको हल्ला फैलिएपछि चिकित्सकहरूले एक्स-रे रिपोर्ट नआएसम्म पोस्टमार्टम गर्न अस्वीकार गरेका थिए।

सामाजिक सञ्जाल र केही सञ्चारमाध्यमहरूमा पत्रकार रजकलाई गोली लागेको खबर सार्वजनिक भएपछि प्रहरीले विज्ञप्ति निकाल्दै ती दाबीहरू भ्रामक भएको बताएको थियो। साथै, यस्ता अफवाह फैलाउनेहरूलाई कारबाही गरिने चेतावनी दिएको थियो।

पोस्टमार्टमका लागि रजकसँगै पठाइएका सविन महर्जनको भने पोस्टमार्टम सकिएको छ। प्रहरी स्रोतका अनुसार, महर्जनको शरीरमा गोली लागेको पुष्टि भएको छ। उनको दायाँ कुहिनो नजिकबाट छिरेको गोली कोख हुँदै ढाडबाट निस्किएको पाइएको छ।

यस घटनाले सुरक्षा व्यवस्थाप्रति गम्भीर प्रश्न उठाएको छ भने प्रदर्शनको क्रममा कस्तो परिस्थितिमा गोली चलेको भन्ने विषय अझै स्पष्ट भइसकेको छैन। प्रहरीले विस्तृत अनुसन्धान जारी रहेको जनाएको छ।