प्रेमचन्द्र महराको हत्यामा संलग्न १ जना वीरगञ्जबाट पक्राउ

बाराको फेटा गाउँपालिका वडा नम्बर ४ फूलबरिया निवासी ४६ वर्षीय प्रेमचन्द्र महराको हत्यामा संलग्न रहेको आरोपमा प्रहरीले १ जनालाई पक्राउ गरेको छ ।

१३ गते शुक्रवार बेलुकी पौने ८ बजे वीरगञ्ज महानगरपालिका वडा नम्बर फूलबरिया टोलस्थित गाई गोठमा खुकुरी प्रहार गरिएको अवस्थामा महराको शब फेला परेको थियो ।

सोही घटनामा संलग्न रहेका वीरगञ्ज महानगरपालिका वडा नम्बर ८ निवासी ३४ वर्षीय दीपक कुमार महरालाई पक्राउ गरिएको पर्साका प्रहरी प्रवक्ता एवम् प्रहरी नायब उपरीक्षक ओमप्रकाश खनालले बताए । खनालका अनुसार घटनास्थलबाट हत्यामा प्रयोग भएको खुकुरी बरामद भएको छ ।

अनुसन्धानका क्रममा अनैतिक सम्बन्धको प्रतिशोधस्वरुप हत्या भएको हुन सक्ने प्रहरी नायब उपरीक्षक खनालको भनाई छ । पक्राउ परेका महराविरुद्ध कर्तव्य ज्यान सम्बन्धी कसूरमा आवश्यक अनुसन्धान भईरहेको छ ।