पब्जीको लतमा किशोरद्वारा आमासहित चारको हत्या

पाकिस्तानको पञ्जाब प्रान्तमा १४ वर्षीय किशोरले अनलाइन गेम ुपब्जीु को प्रभावमा आफ्नी आमा‚ दाजु र दिदीबहिनीसहित सम्पूर्ण परिवारको गोली हानी हत्या गरेका छन्। प्रान्तीय राजधानी लाहोरको प्रहरीले उक्त जानकारी दिएको हो। गत हप्ता लाहोरको काहना क्षेत्रमा ४५ वर्षीया स्वास्थ्यकर्मी नाहिद मुबारक, उनका २२ वर्षीय छोरा तैमुर र १७ र ११ वर्षका छोरीको शव भेटिएको थियो।

प्रहरीले विज्ञप्तिमा नाहिद मुबारकका १४ वर्षीय छोरा कुशल रहेको र उनले हत्या गरेको खुलासा गरेको छ। बयानका अनुसार ुकेटा पब्जी ९प्लेयर अननोन्स ब्याटलग्राउन्ड० को लतमा थिए। उनले खेलको प्रभावमा आफ्नी आमा‚ दाजु र दिदीबहिनीको हत्या गरेको स्वीकार गरिसकेका छन्। दिनमा लामो समयसम्म अनलाइन गेम खेल्दा उनलाई केही मनोवैज्ञानिक समस्या देखिएको छ।

नाहिद मुबारक सम्बन्धविच्छेद गरेकी महिला थिइन्। पढाइमा ध्यान नदिने र दिनभर ‘पब्जी’ खेलेको भन्दै उनले छोरालाई गाली गर्ने गरेकी थिइन्।विज्ञप्तिमा भनिएको छ( घटना भएको दिन नाहिदले छोरालाई गाली गरेकी थिइन्। त्यसपछि किशोरले दराजबाट आमाको पेस्तोल निकालेर आमा‚ दाजु र दिदीबहिनीलाई गोली हानी हत्या गरेका थिए।

बयानका अनुसार भोलिपल्ट बिहान किशोरले हल्लाखल्ला गरे र छिमेकीहरूले प्रहरीलाई बोलाए। त्यतिवेला किशोर आफू घरको माथिल्लो तलामा रहेको र कसरी आफ्नो परिवारको हत्या भयो थाहा नभएको प्रहरीलाई बताए।नाहिद मुबारकले परिवारको सुरक्षाका लागि पेस्तोल किनेकी थिइन् र उनीसँग लाइसेन्स पनि रहेको प्रहरीले जनाएको छ। हत्यापछि किशोरले फ्याँकेको पेस्तोल खोजी गरिरहेको प्रहरीले जनाएको छ।

प्रहरीले किशोरको रगत लतपतिएको लुगा बरामद गरिएको बताए। ुडनुको समाचारअनुसार लाहोरमा अनलाइन गेमसँग सम्बन्धित यो चौथो अपराध हो। यहाँ पहिलो घटना सन् २०२० मा भएको थियो। लाहोरका तत्कालीन प्रहरी अधिकारी जुल्फिकार हमिदले मानिसहरूको जीवन, समय र लाखौं किशोरकिशोरीहरूको भविष्य बचाउन खेलमा प्रतिबन्ध लगाउन सिफारिस गरेका थिए।

(एजेन्सीको सहयोगमा