अत्यधिक गर्मी बढेपछि वीरगन्ज महानगरपालिकाका विद्यालय दुई दिन बिहान मात्रै कक्षा सञ्चालन गर्न निर्देशन

अत्यधिक गर्मी बढेपछि वीरगन्ज महानगरपालिकाले महानगर क्षेत्रका सामुदायिक तथा संस्थागत विद्यालयमा दुई दिन बिहान मात्रै कक्षा सञ्चालन गर्न निर्देशन दिएको छ ।

महानगरपालिकाको शिक्षा महाशाखाले बुधबार सूचना जारी गर्दै विद्यार्थीको स्वास्थ्यलाई मध्यनजर गरी साउन २८ र २९ गते विद्यालयमा बिहानको समयमा मात्रै कक्षा सञ्चालन गर्न निर्देशन दिएको हो ।

महानगरपालिकाका अनुसार उक्त दुई दिन बिहान ६ बजेदेखि ९ः३० बजेसम्म मात्रै कक्षा सञ्चालन गर्नुपर्नेछ । अत्यधिक गर्मीका कारण विद्यार्थीको स्वास्थ्यमा पर्न सक्ने असरलाई ध्यानमा राख्दै यस्तो व्यवस्था गरिएको महानगरपालिकाले जनाएको छ ।

महानगरपालिकाले आफ्नो क्षेत्रभित्र रहेका सम्पूर्ण सामुदायिक तथा संस्थागत विद्यालयलाई निर्देशनअनुसार बिहानको सत्रमा कक्षा सञ्चालन गर्न आग्रह गरेको छ ।