घरबाटै कर्जा आवेदन दिन सकिने सेवा सुरु, राष्ट्रिय वाणिज्य बैंकको नयाँ पहल

काठमाडौं । राष्ट्रिय वाणिज्य बैंकले ग्राहक सेवालाई थप सरल, पारदर्शी र प्रविधिमैत्री बनाउने उद्देश्यका साथ डिजिटल माध्यमबाट घरमै बसेर कर्जा आवेदन दिन सकिने सुविधा सञ्चालनमा ल्याएको छ।

नेपाल सरकार मन्त्रिपरिषद्ले सार्वजनिक गरेको सुशासन र नतिजामुखी कार्यसम्पादन सम्बन्धी १०० बुँदे कार्ययोजना तथा प्रभावकारी ग्राहक सेवाको अवधारणालाई आत्मसात् गर्दै बैंकले यो सेवा सुरु गरेको जनाएको छ।

बैंकका अनुसार कर्जा प्राप्तिको प्रक्रिया, आवश्यक कागजात तथा आवेदनको अवस्थाबारे ग्राहकमा हुने अन्योल हटाउने उद्देश्यले डिजिटल कर्जा आवेदन प्रणाली सञ्चालनमा ल्याइएको हो। यसबाट ग्राहकले शाखा धाउनुपर्ने झन्झट बिना नै अनलाइनमार्फत कर्जा आवेदन दिन सक्नेछन्।

बैंकले यस सेवाले कर्जा प्रक्रियालाई थप छिटो, सहज र पारदर्शी बनाउने विश्वास व्यक्त गरेको छ।

हाल राष्ट्रिय वाणिज्य बैंकले सातै प्रदेशका ७७ जिल्ला सदरमुकामसहित दुर्गम क्षेत्रसमेत समेट्ने गरी ३१६ शाखा कार्यालयमार्फत कर्जा, निक्षेप, एटीएम, मोबाइल बैंकिङलगायत आधुनिक डिजिटल बैंकिङ सेवा उपलब्ध गराउँदै आएको जनाएको छ।