ह्यारी केनको दुई गोलमा इंग्ल्यान्ड संकटबाट बच्यो, अन्तिम १६ मा प्रवेश
कोल्हवी न्यूज
विश्वकप फुटबल २०२६ मा इंग्ल्यान्ड अपमानजनक हारबाट जोगिँदै अन्तिम १६ (प्रि-क्वार्टरफाइनल) मा प्रवेश गरेको छ।
अमेरिकाको एटलान्टामा सम्पन्न अन्तिम ३२ को खेलमा कप्तान ह्यारी केनले अन्तिम १५ मिनेटभित्र दुई गोल गरेपछि इंग्ल्यान्डले डिआर कंगोलाई २–१ ले पराजित गर्दै नकआउट चरणको यात्रा सुरक्षित गरेको हो।
खेलको सुरुवातमै ब्रायन सिपेङ्गाले गोल गर्दै डिआर कंगोलाई अग्रता दिलाएका थिए। खेल सकिन १५ मिनेट बाँकी रहँदासम्म इंग्ल्यान्ड प्रतियोगिताबाट बाहिरिने अवस्थामा पुगेको थियो।
तर, ७५औँ मिनेटमा ह्यारी केनले हेडिङमार्फत बराबरी गोल गरे। त्यसपछि ८६औँ मिनेटमा उनले डि-बक्सको छेउबाट उत्कृष्ट प्रहार गर्दै व्यक्तिगत दोस्रो तथा टोलीका लागि निर्णायक गोल गरे र इंग्ल्यान्डलाई २–१ को जित दिलाए।
डिआर कंगोका गोलकिपर लियोनेल म्पासीले इंग्ल्यान्डका धेरै अवसर विफल पार्दै उत्कृष्ट प्रदर्शन गरे। पहिलो हाफको अन्त्यतिर योआने विसाले खाली पोस्टमा गोल गर्न नसक्दा कंगोले अग्रता दोब्बर बनाउने अवसर गुमाएको थियो।
विश्वकपमा केनको यो पाँचौँ गोल हो। वैकल्पिक खेलाडीका रूपमा मैदान प्रवेश गरेका एन्थोनी गोर्डनले इंग्ल्यान्डका दुवै गोलका लागि निर्णायक पास उपलब्ध गराए।
अब इंग्ल्यान्डले अन्तिम १६ मा मेक्सिको सिटीस्थित ऐतिहासिक एज्टेका रङ्गशालामा सह-आयोजक मेक्सिकोसँग प्रतिस्पर्धा गर्नेछ।
जित निकाले पनि इंग्ल्यान्डको समग्र प्रदर्शन भने प्रभावशाली देखिएन। रक्षापङ्क्तिमा तालमेलको अभाव र खेलमा देखिएको कमजोरीका कारण मेक्सिकोविरुद्धको खेलअघि टोलीले आफ्नो प्रदर्शनमा उल्लेखनीय सुधार गर्नुपर्ने देखिएको छ।
सम्बन्धित खबरहरु
