मेसीको ऐतिहासिक कीर्तिमान, अर्जेन्टिना नकआउट चरणमा
कोल्हवी न्यूज
विश्व फुटबलका सुपरस्टार Lionel Messi ले अर्को ऐतिहासिक उपलब्धि हासिल गरेका छन्। विश्वकप फुटबलमा सर्वाधिक गोल गर्ने खेलाडीको कीर्तिमान बनाएको दिन अर्जेन्टिनाले अस्ट्रियालाई २–० ले पराजित गर्दै नकआउट चरणमा स्थान सुरक्षित गरेको छ।डलासमा सम्पन्न खेलमा अर्जेन्टिनाले सुरुमै अग्रता लिने अवसर पाए पनि मेसीको पेनाल्टी प्रहार गोलमा परिणत हुन सकेन। नवौं मिनेटमा प्राप्त अवसर गुमेपछि पनि अर्जेन्टिनाले खेलमा दबाब कायम राख्यो।
रक्षात्मक रणनीतिमा उत्रिएको अस्ट्रियाविरुद्ध अर्जेन्टिनालाई अग्रता दिलाउने काम मेसीले नै गरे। ३८औँ मिनेटमा फाकुन्डो मेडिनाको पासमा उनले आकर्षक गोल गर्दै टोलीलाई १–० को अग्रता दिलाए।
खेलको अन्त्यतिर पनि मेसी चम्किए। इन्जुरी समयको पाँचौँ मिनेटमा उनले व्यक्तिगत दोस्रो तथा टोलीका लागि दोस्रो गोल गर्दै अर्जेन्टिनाको जित सुनिश्चित गरे।
यससँगै मेसीले विश्वकप इतिहासमा सर्वाधिक गोल गर्ने खेलाडीको कीर्तिमान आफ्नो नाममा लेखाएका छन्। उनले यसअघि जर्मनीका मिरोस्लाभ क्लोजको नाममा रहेको १६ गोलको कीर्तिमानलाई पछि पारेका हुन्।
यति मात्र होइन, मेसी विश्वकपमा लगातार सात खेलमा गोल गर्ने पहिलो खेलाडीसमेत बनेका छन्। यसअघि फ्रान्सका जस्टिन फोन्टेन र ब्राजिलका जैर्जिन्होले लगातार छ खेलमा गोल गर्ने कीर्तिमान बनाएका थिए।
मेसीको उत्कृष्ट प्रदर्शनमा अर्जेन्टिनाले समूह चरणको यात्रा सफलतापूर्वक टुंग्याउँदै समूह ‘जी’ को विजेताका रूपमा नकआउट चरणमा प्रवेश गरेको छ। पछिल्ला खेलहरूमा निरन्तर प्रभावशाली प्रदर्शन गरिरहेका मेसी अर्जेन्टिनाको उपाधि यात्राका मुख्य आधार बनेका छन्।
