मकवानपुर फास्ट ट्र्याकमा दुर्घटना, कामदारको उपचारकै क्रममा मृत्यु
कोल्हवी न्यूज
मकवानपुरको भीमफेदी गाउँपालिका–८ महादेवटार स्थित काठमाडौँ–तराई–मधेश द्रुतमार्ग (फास्ट ट्र्याक) अन्तर्गतको सुरुङ निर्माणस्थलमा काम गर्ने क्रममा भएको दुर्घटनामा एक कामदारको मृत्यु भएको छ भने अर्का एक जना घाइते भएका छन् ।
गएराति करिब ९ः४५ बजे सुरुङभित्र काम गरिरहेका बेला प्रयोग हुने रिपिट तथा ढुङ्गा खसेर लाग्दा बर्दियाका ३० वर्षीय रामगोपाल चौधरी गम्भीर घाइते भएका थिए । साथै थाहा नगरपालिका–५ सानोपाखा निवासी अन्दाजी २२ वर्षीय सन्तोष बम्जनको दाहिने हातमा सामान्य चोट लागेको प्रहरीले जनाएको छ ।
दुवै घाइतेलाई उपचारका लागि चुरेहिल अस्पताल लगिएको थियो । उपचारकै क्रममा चौधरीको राति ११ः४० बजे मृत्यु भएको जिल्ला प्रहरी कार्यालय मकवानपुर ले जनाएको छ । घाइते बम्जनको सोही अस्पतालमा उपचार भइरहेको छ ।
घटनाबारे जानकारी प्राप्त हुनासाथ प्रहरी टोली अनुसन्धानका लागि घटनास्थलतर्फ खटिएको प्रहरीले जनाएको छ । घटनास्थल इलाका प्रहरी कार्यालय ठिंगन बाट करिब ११ किलोमिटर उत्तर क्षेत्रमा पर्ने बताइएको छ । प्रहरीले मृतकको शव हेटौंडा अस्पताल ल्याउने तयारी भइरहेको तथा घटनाबारे थप अनुसन्धान जारी रहेको जनाएको छ ।
