बारा दुर्घटना: सांसदको कारसँग मोटरसाइकल ठोक्किँदा दुई घाइते
कोल्हवी न्यूज
बारा — पर्सा क्षेत्र नम्बर–१ का सांसद हरी पन्त सवार गाडी दुर्घटनामा परेको छ। दुर्घटनामा मोटरसाइकलमा सवार दुई युवक घाइते भएका छन् भने सांसद पन्त सकुशल रहेका छन्।
बुधबार साँझ करिब ४ बजे वीरगञ्जबाट पथलैयातर्फ जाँदै गरेको बा.१६ च ८२०६ नम्बरको कार जीतपुर सिमरा–७ स्थित गढीमाई मन्दिर नजिकै विपरीत दिशाबाट आएको मोटरसाइकलसँग ठोक्किँदा दुर्घटना भएको प्रहरीले जनाएको छ।
दुर्घटनामा मोटरसाइकल चालक कलैया–७ का २० वर्षीय नवलकिशोर यादव र पछाडि सवार १७ वर्षीय जितेन्द्र यादव घाइते भएका छन्। कार चालक वीरगञ्ज–११ का ५२ वर्षीय मोहनलाल राउत रहेको जनाइएको छ।
घटनापछि सांसद पन्तले घाइते दुवैलाई आफ्नै गाडीमार्फत सिमरास्थित अस्पताल पुर्याएका थिए। उपचारपछि एक जना घर फर्किसकेका छन् भने अर्का एक जनाको उपचार जारी रहेको छ।
दुर्घटनामा कारको अगाडिको भागमा क्षति पुगेको छ भने मोटरसाइकल पनि नोक्सान भएको छ। प्रहरीका अनुसार दुवै पक्षबीच आपसी सहमति भएपछि कार सांसद पन्तले जिम्मामा लगेका छन् भने मोटरसाइकल जीतपुर प्रहरी चौकीमा राखिएको छ।
