‘परालको आगो’को मर्मस्पर्शी ट्रेलर सार्वजनिक, दुई दम्पतीको विपरीत जीवनकथा प्रस्तुत
कोल्हवी न्यूज
नेपाली साहित्यकार गुरुप्रसाद मैनाली को चर्चित कथा ‘परालको आगो’मा आधारित सोही नामको चलचित्रको ट्रेलर सार्वजनिक गरिएको छ। निर्देशक लक्ष्मण सुनार ले निर्माण गरेको यो फिल्मले नेपाली समाजको यथार्थलाई आधुनिक सन्दर्भसँग जोड्ने प्रयास गरेको देखिन्छ।
बिहीबार आयोजित पत्रकार सम्मेलनमार्फत सार्वजनिक गरिएको ट्रेलरले दुई भिन्न सामाजिक अवस्थाका दुई दम्पतीको कथा प्रस्तुत गरेको छ। एकातिर भौतिक रूपमा सम्पन्न भए पनि आपसी सम्बन्धमा असन्तुष्टि र द्वन्द्व रहेको दम्पतीको जीवन देखाइएको छ भने अर्कोतर्फ आर्थिक रूपमा कमजोर तर प्रेम, सम्मान र समझदारीले भरिएको सुखी दम्पतीको कथा प्रस्तुत गरिएको छ।
ट्रेलरमा प्रकाश सपूत र सुहाना थापा सम्पन्न तर सम्बन्धमा तनावपूर्ण दम्पतीका रूपमा देखिएका छन्। त्यस्तै, सौगात मल्ल र सृजना अधिकारी आर्थिक रूपमा कमजोर तर सन्तुष्ट दम्पतीका रूपमा प्रस्तुत छन्।
ग्रामीण परिवेशमा छायांकन गरिएको फिल्मले पुरानो नेपाली समाजको झल्को दिने मात्र होइन, अहिले पनि पारिवारिक सम्बन्धका आधारभूत मूल्यहरू उत्तिकै सान्दर्भिक रहेको सन्देश दिन खोजेको छ।
निर्देशक सुनारले फिल्म भावनात्मक रूपमा दर्शकसँग जोडिने र सामाजिक सन्देश दिने दाबी गरेका छन्। कलाकारहरूले पनि फिल्मले दाम्पत्य सम्बन्ध र सामाजिक यथार्थलाई प्रभावकारी रूपमा प्रस्तुत गरेको बताएका छन्।
‘परालको आगो’ आगामी वैशाख ११ गतेदेखि देशभर प्रदर्शनमा आउने तयारीमा छ।
