मल आपूर्ति सुनिश्चित गर्न किसान महासङ्घको सरकारसँग माग

अखिल नेपाल किसान महासङ्घ (क्रान्तिकारी केन्द्र) ले देशभर रासायनिक मलको अभाव भएको भन्दै तत्काल आपूर्ति सुनिश्चित गर्न सरकारसँग माग गरेको छ।

आइतबार विज्ञप्ति जारी गर्दै महासङ्घले धान र कोदोको बीउ राख्ने, मकै गोड्ने, चैते धानमा मल हाल्ने तथा वर्षे तरकारी खेतीको संवेदनशील समयमा मलको चरम अभाव देखिएको जनाएको हो।

महासङ्घका अनुसार धान, मकै र कोदो जस्ता बालीहरू राष्ट्रिय अर्थतन्त्र र किसानको जीविकासँग प्रत्यक्ष जोडिएका रणनीतिक बाली हुन्। यस्तो महत्वपूर्ण समयमा मल नपाउनु र किसानहरू लामो लाइनमा बस्न बाध्य हुनु अत्यन्तै दुर्भाग्यपूर्ण अवस्था भएको विज्ञप्तिमा उल्लेख छ।

महासङ्घले कालोबजारी नियन्त्रण गर्न, दीर्घकालीन समाधानको योजना बनाउन तथा साना र उत्पादक किसानलाई प्राथमिकतामा राखी मल वितरण गर्न सरकारसँग आग्रह गरेको छ।