भारत–नेपाल सीमामा सुरक्षा कडा: हजारौं सशस्त्र प्रहरी परिचालन
कोल्हवी न्यूज
भारतसँग जोडिएको सीमाक्षेत्रमा सुरक्षा व्यवस्था थप कडा बनाइएको छ। सशस्त्र प्रहरी बल नेपाल ले अवैध गतिविधि नियन्त्रण गर्न ठूलो संख्यामा सुरक्षाकर्मी परिचालन गरेको हो।
सशस्त्र प्रहरीका प्रवक्ता डीआईजी विष्णुप्रसाद भट्ट का अनुसार हाल २७ जिल्लाबाट करिब २ हजार २०० सुरक्षाकर्मी सीमामा खटिएका छन्। केही दिनमै यो संख्या बढाएर करिब ३ हजार पुर्याइने तयारी गरिएको छ।
झापादेखि कञ्चनपुरसम्म फैलिएका तराईका जिल्लामा २४ घण्टा गस्ती सञ्चालन गरिएको छ। विभिन्न बाहिनी, गण र गुल्ममार्फत सीमामा जनशक्ति परिचालन गरिएको छ।
सरकारले आवश्यक परे पहाडी जिल्लाबाट समेत थप सुरक्षाकर्मी झिकेर सीमामा स्थायी रूपमा तैनाथ गर्ने योजना बनाएको छ। दीर्घकालीन रूपमा १० देखि १२ हजार जनशक्ति आवश्यक पर्ने प्रस्तावसमेत अघि सारिएको छ।
यसैबीच, भीड नियन्त्रणसम्बन्धी कार्यविधिमा परिवर्तनको तयारी भइरहेको छ। प्रस्तावित व्यवस्था अनुसार प्रारम्भिक चरणमा नेपाल प्रहरी ले नै सम्झाउने, लाठीचार्ज, अश्रुग्यास तथा पानीको फोहरा प्रयोग गर्नेछ। अवस्था नियन्त्रण बाहिर गएपछि मात्र सशस्त्र प्रहरी परिचालन गरिनेछ।
सुरक्षा निकायबीच समन्वयमा देखिएको समस्यालाई समाधान गर्न यस्तो स्पष्ट कार्यविभाजन गर्न लागिएको हो। नयाँ निर्देशिका हाल गृह मन्त्रालय मा छलफलमा छ।
सीमा सुरक्षा थप मजबुत बनाउन बोर्डर आउट पोस्ट (BOP) को संख्या २६० बाट बढाएर ४२५ पुर्याउने प्रस्ताव पनि अघि बढाइएको छ।
साथै, सशस्त्र प्रहरीलाई औद्योगिक क्षेत्र र रेलमार्ग सुरक्षामा समेत विस्तार गर्ने योजना छ। कीर्तिपुरस्थित नीलबाराही गण लाई विशेष दंगा नियन्त्रण इकाइका रूपमा विकास गरिएको छ।
