४० हजार घुससहित सशस्त्र प्रहरी इन्स्पेक्टर पक्राउ

वीरगञ्जमा सशस्त्र प्रहरी बलका एक प्रहरी निरीक्षक घुस रकमसहित रंगेहात पक्राउ परेका छन्। प्रहरी निरीक्षक ओकिल अधिकारीलाई अख्तियार दुरुपयोग अनुसन्धान आयोगको टोलीले शुक्रबार बिहान नियन्त्रणमा लिएको हो। अख्तियारको बर्दिबास क्षेत्रीय कार्यालयबाट खटिएको टोलीले उनलाई मिथिला नगरपालिका–४ लालगढबाट पक्राउ गरेको जनाएको छ। आरोप अनुसार अधिकारीले कमला–ढल्केवर–बाग्मती सडक निर्माणमा संलग्न ठेकेदारसँग सवारी साधन रोक्ने, अवरोध सिर्जना गर्ने तथा अनावश्यक हैरानी दिने जस्ता गतिविधि गर्दै घुस माग्दै आएका थिए। निर्माण कार्यमा अवरोध नगर्ने सर्तमा रकम मागिएको उजुरीपछि अख्तियारले निगरानी बढाएको थियो। सोही क्रममा उनले ठेकेदारबाट ४० हजार रुपैयाँ लिइरहेको अवस्थामा रंगेहात पक्राउ गरिएको हो। घटनाबारे विस्तृत अनुसन्धान जारी रहेको अख्तियारले जनाएको छ।