महोत्तरीमा ट्र्याक्टरको ठक्करबाट दुई बालिकाको दुःखद मृत्यु

महोत्तरीमा खेत जोत्ने क्रममा सञ्चालनमा रहेको ट्र्याक्टरले ठक्कर दिँदा दुई बालिकाको ज्यान गएको छ। घटनाले स्थानीयवासीलाई स्तब्ध बनाएको छ।

मृत्यु हुनेमा मटिहानी नगरपालिका–४ मझौराकी ७ वर्षीया फरहाना खातुन र सिराहा नगरपालिका–११ मरडाकी ८ वर्षीया रफिया खातुन रहेको प्रहरीले जनाएको छ। दुवै बालिका खेत नजिकै रहेका बेला ट्र्याक्टरको चपेटामा परेका थिए।

दुर्घटनापछि दुवै जनाको शव परीक्षणका लागि प्रादेशिक अस्पताल जलेश्वर पठाइएको छ।

जिल्ला प्रहरी कार्यालय महोत्तरीका प्रवक्ता तथा प्रहरी नायब उपरीक्षक शैलेन्द्र भट्टका अनुसार घटनापछि फरार रहेका ट्र्याक्टर चालकको खोजी कार्य जारी छ। साथै घटनाको कारणबारे थप अनुसन्धान भइरहेको प्रहरीले जनाएको छ।