कोल्हवी न्यूज
मुग्लिङ–नारायणगढ सडकखण्डको घुमाउने क्षेत्रमा शुक्रबार बिहान यात्रुवाहक बस दुर्घटनामा परेको छ। दाङबाट काठमाडौं जाँदै गरेको लुम्बिनी प्रदेश ०२–००१ ख ०४६० नम्बरको बस बिहान करिब ३:१५ बजे अनियन्त्रित भई सडकमा पल्टिएको हो।दुर्घटनामा ३८ जना यात्रु घाइते भएका छन्। प्रहरीका अनुसार तीमध्ये १० जनाको अवस्था मध्यम छ भने बाँकी घाइतेहरूको अवस्था सामान्य रहेको छ। बस चालक र सहचालक पनि सामान्य घाइते भएका छन्।
घाइतेहरूको भरतपुर र मुग्लिङका विभिन्न अस्पतालमा उपचार भइरहेको छ। मौलाकालिका अस्पतालमा १५, पुरानो मेडिकल कलेजमा १३, जनता केयर मुग्लिङमा ६ र नयाँ मेडिकल कलेजमा ४ जनालाई भर्ना गरिएको प्रहरीले जनाएको छ।
