भारतको हरिद्वारमा देश–विदेशबाट फर्किएका १८ ज्योति कलश शान्तिकुञ्ज पुगे

सञ्जय मिश्रा,नेपाल:डेढ वर्षअघि गुजरातबाट सुरु भएको ज्योति कलश यात्राअन्तर्गत देश–विदेशका विभिन्न क्षेत्रबाट फर्किएका कुल १८ वटा ज्योति कलश बिहीवार हरिद्वार स्थित शान्तिकुञ्ज पुगेका छन्।

आयोजकका अनुसार यो आगमन आगामी जन्मशताब्दी समारोहको तयारीमा एक महत्वपूर्ण चरण पूरा भएको संकेत हो।प्राप्त विवरणअनुसार अष्ट्रेलिया, पूर्वी अफ्रिका, दक्षिण अफ्रिका, गुजरात, आन्ध्रप्रदेश–तेलङ्गाना, बिहार, झारखण्ड, उत्तर–पश्चिम भारत, छत्तीसगढ तथा उडिसाका विभिन्न स्थान हुँदै ती ज्योति कलश शान्तिकुञ्ज आइपुगेका हुन्।

यात्राका क्रममा सम्बन्धित क्षेत्रहरूमा धार्मिक तथा सामाजिक कार्यक्रम आयोजना गरिएको थियो,जसमा स्थानीय समुदायको उल्लेखनीय सहभागिता रहेको बताइएको छ।

शान्तिकुञ्ज पुगेपछि जन्मशताब्दी समारोहका दलनायक डा. चिन्मय पण्ड्या तथा आदरणीया शेफाली दीदीले प्रखर प्रज्ञा–सजल श्रद्धा समाधि स्थलमा पुष्पार्चन गरी विधिवत् रूपमा कलश पूजन गर्नुभएको थियो। त्यसपछि ज्योति कलशसँग आएका प्रतिनिधि तथा परिवारजनलाई टीका लगाई स्वागत गरिएको थियो।

कलश पूजनपछि वेदमन्त्रको उच्चारण र शंखनादका साथ शोभायात्रा निकालिएको थियो। शोभायात्रा गायत्री मन्दिर परिसर हुँदै साधना कक्षसम्म पुगेको थियो, जहाँ ज्योति कलशहरूको स्थापना गरिएको छ। आरतीसँगै कार्यक्रम सम्पन्न भएको आयोजकले जनाएका छन्।

आयोजकका अनुसार यो यात्राको उद्देश्य देश–विदेशमा जन्मशताब्दी समारोहप्रति जनसम्पर्क र सहभागिता सुदृढ गर्नु हो। विभिन्न स्थानबाट प्राप्त श्रद्धा र शुभकामनालाई प्रतीकात्मक रूपमा ज्योति कलशमार्फत शान्तिकुञ्ज ल्याइएको बताइएको छ।

उल्लेखनीय छ कि आगामी दिनहरूमा देश तथा विदेशबाट थप अखण्ड दीपका ज्योति कलश शान्तिकुञ्ज आइपुग्ने सम्भावना रहेको आयोजकले बताएका छन्। यी गतिविधिसँगै जन्मशताब्दी समारोहको तयारी अन्तिम चरणमा प्रवेश गरिरहेको छ।