सुनसरीको दुहबी–३ मा श्रीमतीमाथि आगजनी प्रयास गर्ने आरोपी पक्राउ
कोल्हवी न्यूज
सुनसरीको दुहबी नगरपालिका–३ स्थित मुक्तिनाथ मन्दिर क्षेत्रका एक व्यक्तिले आफ्नै श्रीमतीमाथि पेट्रोल छर्की आगो लगाएको घटनामा संलग्न आरोपीलाई प्रहरीले पक्राउ गरेको छ ।
इलाका प्रहरी कार्यालय दुहबीका अनुसार ३३ वर्षीय मुस्तफा सेखले घरायसी वादविवादका क्रममा २८ वर्षीया श्रीमती खुस्बु खातुनको शरीरमा पेट्रोल खन्याएर बिहीबार आगो सल्काएका थिए ।
घटनाबारे जानकारी पाउनासाथ छिमेकी र स्थानीयले प्रहरीलाई खबर गरेका थिए । त्यसपछि प्रहरी सहायक निरीक्षक शिव नारायण माझीको कमाण्डमा खटिएको टोलीले गम्भीर घाइते महिलाको उद्धार गरी नजिकैको सामुदायिक अस्पतालमा उपचारका लागि पठाएको थियो ।
त्यहाँ उपचार सम्भव नभएपछि घाइते महिलालाई थप उपचारका लागि बिहीबार साँझ विराटनगरस्थित पारस अस्पताल भर्ना गरिएको प्रहरीले जनाएको छ । आगोले जलेर महिलाको दुवै हात, घाँटी, छाती र अनुहारमा गम्भीर चोट लागेको छ ।
घटनापछि फरार नभई पक्राउ परेका मुस्तफा सेखलाई हाल इलाका प्रहरी कार्यालय दुहबीमा राखी थप अनुसन्धान भइरहेको प्रहरीले जनाएको छ ।
