संयुक्त राष्ट्रसंघको राहत सामग्री बोकेको सवारीमाथि रुसी आक्रमण
कोल्हवी न्यूज
युक्रेनको आंशिक रूपमा रूसी नियन्त्रणमा रहेको खेरसोन क्षेत्रमा रूसले संयुक्त राष्ट्रसंघ (यूएन) को राहत सामग्री बोकेको सवारीमाथि आक्रमण गरेको युक्रेनी अधिकारी र संयुक्त राष्ट्रसंघले बताएका छन्। यस घटनामा कुनै मानवीय क्षति भने नभएको जनाइएको छ।
संयुक्त राष्ट्रसंघका अनुसार, फ्रन्टलाइनमा रहेको बिलोजेर्का नगरतर्फ मानवीय सहायता लिएर जाँदै गरेको चारवटा सवारी साधनको टोलीमाथि रूसी ड्रोन र तोपबाट आक्रमण भएको थियो। संयुक्त राष्ट्रसंघको विज्ञप्तिमा नाम स्पष्ट रूपमा अंकित गरिएका चारवटै गाडीहरू रूसी सेनाको आक्रमणको सिकार बनेको उल्लेख छ।
युक्रेनका लागि संयुक्त राष्ट्रसंघीय मानवीय समन्वयकर्ता माट्थियास श्मालेले यो आक्रमणलाई पूर्ण रूपमा अस्वीकार्य भन्दै राहतकर्मीहरूलाई अन्तर्राष्ट्रिय मानवीय कानुनले सुरक्षा दिएको र उनीहरूलाई लक्षित गर्नु नहुने बताएका छन्। उनले संयुक्त राष्ट्रसंघीय खाद्य कार्यक्रम अन्तर्गत रहेका दुई गाडीहरू क्षतिग्रस्त भएको र बाँकी दुई गाडी सुरक्षित रहेको जानकारी दिए।
संयुक्त राष्ट्रसंघको यौन तथा प्रजनन स्वास्थ्य एजेन्सी (यूएनएफपीए) ले ती गाडीहरूले जेष्ठ नागरिक, महिला र किशोरीहरूका लागि अत्यावश्यक ८०० व्यक्तिगत राहत सामग्री बोकेका जनाएका थिए। युक्रेनका लागि यूएनएफपीएका प्रतिनिधि ज्याकलिन माहोनले उक्त क्षेत्रमा जेष्ठ नागरिकहरूको सङ्ख्या अत्यधिक रहेको र बमबारी तथा ड्रोन आक्रमणका कारण अन्यत्र जान नसक्ने धेरैजसोको जीविकोपार्जन राहतमै निर्भर रहेको बताए।
सम्बन्धित खबरहरु
