ट्रम्पद्वारा शुक्रबार पुटिनलाई भेट्ने घोषणा

अमेरिकी राष्ट्रपति डोनाल्ड ट्रम्पले युक्रेन युद्ध अन्त्य गर्न रुसी राष्ट्रपति भ्लादिमिर पुटिनसँग आगामी शुक्रबार (१५ अगस्ट २०२५) मा अलास्कामा भेट्ने घोषणा गरेका छन्। यो भेट युक्रेन युद्ध रोक्ने सम्भावित शान्ति सम्झौताको लागि महत्त्वपूर्ण कदम मानिएको छ।

ट्रम्पले सामाजिक सञ्जाल ‘ट्रुथ सोसल’ मा बैठकको जानकारी दिँदै भनेका छन्, ‘संयुक्त राज्य अमेरिकाको राष्ट्रपतिको रूपमा मेरो र रूसका राष्ट्रपति भ्लादिमिर पुटिन बिचको बहुप्रतिक्षित बैठक आगामी शुक्रबार (१५ अगस्ट २०२५) मा अलास्कामा हुनेछ। थप विवरण पछि आउनेछ।’

ट्रम्पको घोषणा उनले पुटिनलाई शान्ति स्थापना गर्न वा गम्भीर आर्थिक सजाय भोग्न समयसीमा तोकेको दिन आएको हो। क्रेमलिनले यो पुष्टि गरेको छैन। तर दुवै देशले चाँडै बैठक हुने अपेक्षा गरेका थिए। पुटिनले पहिले नियमित रूपमा अमेरिकी नेताहरूसँग भेटघाट गर्थे। सन् २०१४ मा मस्कोले युक्रेनको क्रिमिया कब्जा गरेपछि, २०१६ को अमेरिकी चुनावमा हस्तक्षेपको आरोप लागेपछि रुस र पश्चिमी देशहरूबिच तनाव बढ्यो र सम्बन्ध चिसियो।

पुटिनको अमेरिका भ्रमण सन् २०१५ मा न्यूयोर्कको संयुक्त राष्ट्रसंघ महासभामा भएको थियो। यो अलास्का बैठक सन् २०२१ पछि पहिलो अमेरिका-रूस शिखर सम्मेलन हुनेछ, जब तत्कालीन अमेरिकी राष्ट्रपति जो बाइडेनले पुटिनलाई जेनेभामा भेटेका थिए।

पुटिनको योजनामा युक्रेनले पूर्वी डोनबास र सन् २०१४ मा कब्जा गरिएको क्रिमिया सुम्पनुपर्ने छ। यो प्रस्तावले युरोपेली नेताहरूमा चिन्ता बढाएको छ, किनकि यो ट्रम्पको प्रतिबन्ध धम्कीबाट बच्ने रुसी रणनीति हुन सक्छ। युक्रेनको संविधानले क्षेत्र सुम्पन रोक लगाउँछ, जसले राष्ट्रपति भोलोदिमिर जेलेन्स्कीलाई संसद् वा जनमत संग्रहको स्वीकृति चाहिन्छ।

ट्रम्पले जेलेन्स्कीलाई सम्झौता सहज बनाउन आग्रह गरेका छन्। तर युक्रेनी सेनाले रुससँग लडाइँ जारी राख्ने अडान लिएको छ। डोनेट्स्कका एक कमान्डरले भने, ‘रुस वार्तामा इच्छुक छैन, एकमात्र विकल्प उसलाई परास्त गर्नु हो।’

पुटिनले हालै चिनियाँ राष्ट्रपति सी जिनपिङ, भारतीय प्रधानमन्त्री नरेन्द्र मोदी र अन्य नेताहरूसँग फोन वार्ता गरेर शान्ति योजनाबारे छलफल गरेका थिए। ट्रम्पले केही क्षेत्रको आदानप्रदानबाट युद्ध रोक्न सकिने संकेत गरेका छन्।

यो बैठक सन् २०१८ को हेलसिन्की भेटपछि ट्रम्प र पुटिनको पहिलो प्रत्यक्ष भेट हुनेछ। एजेन्सी