सामाजिक सञ्जाल ‘एक्स’ लाई प्रतिबन्ध लगाउने ब्राजिलको सर्वोच्च अदालतकाे धम्की

ब्राजिलको सर्वाेच्च अदालतका न्यायाधीश अलेक्जान्ड्रे डे मोरेसले एलन मस्कलाई २४ घण्टाभित्र आफ्नो सामाजिक सञ्जाल ‘एक्स’ को तर्फबाट कानूनी प्रतिनिधि नियुक्त गर्न आदेश दिनुभएको छ ।

न्यायाधीश मोरेसले एलन मस्कले कानून व्यवसायी नियुक्त नगरेमा सामाजिक सञ्जाल ‘एक्स’ लाई देशव्यापी रूपमा प्रतिबन्ध लगाउने चेतावनी दिनुभएको समाचार संस्था एएनआईले जनाएको छ । सर्वाेच्च अदालतले न्याय प्रक्रियामा बाधा पुर्‍याएमा ब्राजिलमा ‘एक्स’ को सञ्चालन प्रतिबन्ध हुने चेतावनी दिएको छ ।

यस वर्षको शुरूमा ब्राजिलको सर्वाेच्च अदालतका न्यायाधीश मोरेसले ‘एक्स’ का विभिन्न खाताबाट दुष्प्रचार फैलाएको आरोप लगाउँदै केही खाता बन्द गर्न आदेश दिएपछि विवाद शुरू भएको हो । तर ‘एक्स’ का प्रमुख मस्कले ब्राजिलका न्यायाधीशको आदेशलाई चुनौती दिँदै पुराना केही खातामाथिको प्रतिबन्ध हटाउनुभएको थियो । एजेन्सी