दाइजोको निहुँमा २३ वर्षीय निकिताको हत्या ! श्रीमान् पक्राउ
कोल्हवी न्यूज
दाइजो नल्याएको निहुँमा विराटनगर माइती भएकी २३ वर्षीय निकिता चौधरीको श्रीमानले हत्या गरेको माइती पक्षले आरोप लगाएका छन् । इनरुवा नगरपालिकाका – ३ घर भएकी निकिताको श्रीमान् नगेन्द्र भगतले हत्या गरेको माइती पक्षले आरोप लगाएका हुन् ।
माइती पक्षले दाइजोको निहुँमा पटक – पटक निकितामाथि कुटपिट हुने गरेको भन्दै दोषीलाई कारबाहीको माग गर्दै जिल्ला प्रहरी कार्यालय सुनसरी अगाडि प्रदर्शन गर्दै आएका छन् । उनको शनिवार राती मृत्यु भएको थियो । बाथरुममा झुन्डिएको भन्दै निकितालाई उपचारका लागि जिल्ला अस्पताल इनरुवामा लगिएको थियो ।
अस्पतालले उपचार हुन नसक्ने भन्दै रेफर गरेपछि थप उपचारका लागि विराट टिचिङ हस्पिटल ल्याउने क्रममा निकिताको निधन भएको थियो । उनको मृत्युको विषयमा भगत परिवारले फरक –फरक कुरा बताउँदै आएको भाइ राकेश चौधरीले बताए ।
उनका अनुसार भगत परिवारले कहिले बाथरुममा चिप्लिएको, कहिले आत्महत्या गरेको बताउने गरिएको छ । दाइजोको निहुँमा उनकै श्रीमानले हत्या गरेको आरोप माइती पक्षको छ । शनिवार राती करिब साढे ९ बजेतिर निकिताले श्रीमान् र परिवारसँग झगडा भइरहेको माइतीमा आमालाई फोन गरेर जानकारी गराएकी थिइन् ।
त्यसको आधा घण्टापछि निकिताले झुन्डिएर आत्महत्या गरेको नगेन्द्रकी भान्जीले निकीताका भाइलाई खबर गरेकी थिइन् । त्यसपछि निकिताकी जेठानीले बाथरुममा चिप्लिएर सख्त घाइते भएको भन्दै जिल्ला अस्पतालमा आउन आग्रह गरेको माइती पक्षले दाबी गरेको छ ।
दाइजोको विषयमा झगडा परिरहेको बताएको केही क्षणमा निकिताको मृत्युको कारण विरोधाभासपूर्ण तरीकारले जानकारी गराइएको माइती पक्षले दाबी गर्दै आएका छन् ।
निकीताका भाइ राकेश चौधरीले नागेन्द्रले दिदी निकितामाथि धारिलो हतियार प्रहार गर्नुका साथै घाँटी थिचेर हत्या गरेको आरोप लगाए । निकिताले तिजमा लगाउन चार हजार रुपैयाँको सारी किनिदिन नागेन्द्रसँग आग्रह गरेको गरेपछि विवाद भएको माइती पक्षले दाबी गरेको छ ।
शनिवार साँझ आमासँग श्रीमान् नागेन्द्रलाई सारी किनिदिन आग्रह गरेको र नागेन्द्रले सारी किनिदिनु परे नाम मेटाइदिने भन्दै धम्की दिएको कुरा सुनाएकी थिइन् । नागेन्द्रले आफ्नी छोरीलाई माइतीबाट थप दाइजो ल्याउन दबाब दिँदै कुटपिट गरी हत्या गरेको माइती पक्षले आरोप लगाएका छन् ।
नगेन्द्रका दाजु गोपी भगतले भने परिवारमा कुनै झैझगडा नभएको दाबी गरेका छन् । उनले नगेन्द्रले निकितालाई तीजको सारी किनिदिएको तर सारी किनिदिएपछि तिम्रो बुबाले किन सारी नकिनिदिएको भन्दै जिस्काएको दाबी गरे । यही विषयमा दुबैबिच झगडा भएको भगतले बताए ।
माइती पक्षले निकिताको दाइजोको निहुँमा हत्या भएको भन्दै जिल्ला प्रहरी कार्यालय सुनसरीमा नागेन्द्रविरुद्ध जाहेरी दिएका छन् । सोही जाहेरीका आधारमा नागेन्द्रलाई आइतबार नै नियन्त्रणमा लिइएको जिल्ला प्रहरी कार्यालय सुनसरीका प्रहरी उपरीक्षक विपिन रेग्मीले जानकारी दिए ।
निकितासँग दोस्रो विवाह गरेका नागेन्द्रलाई दाइजो स्वरूप माइती पक्षले २५ लाख नगद, १० तोला सुन र ८० तोला चाँदी दिएका थिए । निकिता र नागेन्द्रबिच २१ महिनाअघि मागी विवाह भएको थियो ।
