प्रतिनिधि विवादले रास्वपा महाधिवेशन प्रभावित, बन्दसत्र मंगलबारलाई सर्यो
कोल्हवी न्यूज२०८३ असार ८, सोमबार १८:२९ गते
चितवनमा जारी राष्ट्रिय स्वतन्त्र पार्टी (रास्वपा) को पहिलो राष्ट्रिय महाधिवेशन प्रतिनिधि छनोटसम्बन्धी विवादका कारण प्रभावित भएको छ। महाधिवेशन प्रतिनिधिको नामावली सच्याउने कार्य अपेक्षाभन्दा लामो समय लागेपछि सोमबारका लागि तय गरिएको बन्दसत्र स्थगित गरिएको हो।केन्द्रीय निर्वाचन आयोगका अनुसार अब बन्दसत्र मंगलबार बिहानबाट सुरु हुनेछ। प्रतिनिधिको अन्तिम सूची टुंगो लगाउने प्रक्रियामा ढिलाइ हुँदा निर्वाचन कार्यतालिका समेत प्रभावित भएको जनाइएको छ।
बन्दसत्र स्थगित भएसँगै महाधिवेशनको समग्र कार्यक्रम एक दिन लम्बिने देखिएको छ। महाधिवेशनबाट रास्वपाले नयाँ नेतृत्व चयन गर्ने भएकाले बन्दसत्र र निर्वाचन प्रक्रिया पार्टीका लागि महत्वपूर्ण मानिएको छ।
रास्वपाको पहिलो राष्ट्रिय महाधिवेशनको उद्घाटन आइतबार पार्टी सभापति रवि लामिछाने र वरिष्ठ नेता तथा काठमाडौं महानगरपालिकाका प्रमुख बालेन्द्र शाह (बालेन) ले गरेका थिए। महाधिवेशनमा देशभरबाट आएका प्रतिनिधिहरूको सहभागिता रहेको छ।
पार्टीभित्र प्रतिनिधि व्यवस्थापन र नामावली मिलानको काम जारी रहेकाले महाधिवेशनका बाँकी कार्यक्रम संशोधित कार्यतालिकाअनुसार सञ्चालन गरिने जनाइएको छ।
