कठिन बन्दै बार्सिलोनाको नकआउट चरणको यात्रा
कोल्हवी न्यूज
घरेलु मैदानमा इटालियन क्लब इन्टर मिलानसँग ३–३ को बराबरीमा रोकिएपछि स्पेनिस महारथी बार्सिलोना लगातार दोस्रो सिजन च्याम्पियन्स लिगको समूह चरणबाटै बाहिरिने सम्भावना बढ्दै गएको छ ।
अघिल्लो साता सानसिरोमा सम्पन्न पहिलो लेगमा इन्टरसँग पराजित भएपछि जाभीको टिम बार्सिलोनालाई बुधबार राति क्याम्प नोउमा जित्नु पर्ने थियो । तर, सुरुमै अग्रता लिएर पनि बार्सिलोनाले त्यसलाई जोगाउन भने सकेन । घरमै पराजित हुन लागेको बार्सिलोनालाई इन्जुरी समयमा रोबर्ट लेवानडोस्कीले उद्दार गरेका थिए ।
बार्सिलोनाले ४० औं मिनेटमा औसमाने डेम्बेलेको गोलबाट अग्रता लिएको थियो । ५० औं मिनेटमा इन्टरका निकोला बरेलाले बराबरी गोल फर्काए । ६३ औं मिनेटमा लौटारो मार्टिनेजले गरेको गोलबाट इन्टरले अग्रता लियो । ८२ औं मिनेटमा लेवानडोस्कीले बराबरी गोल फर्काए । ८९ औं मिनेटमा रोबिन गोसेन्सले गरेको गोलबाट इन्टरले पुनः अग्रता लियो । ६ मिनेट इन्जुरी समयको दोस्रो मिनेटमा लेवानडोस्कीले गोल गरेपछि बार्सिलोना हारबाट जोगियो ।
अन्तिम समयमा सिमोन इन्जाघीले रातो कार्डको सामना गरेपछि इन्टरले १० खेलाडीमा रहेर खेलको अन्त्य गरेको थियो । बराबरीपछि बार्सिलोनाको नकआउट चरणको यात्रा कमजोर बनेको छ ।
‘‘अब हामीलाई आफूले जितेर मात्र पनि हुँदैन । अन्य टिमको नतिजामा पनि भर पर्नुपर्छ । यो हाम्रै गल्तीका कारण भएको हो । र अब यसलाई सुधार गर्नुपर्छ । अहिलेको वास्तविकता यही हो । युरोपमा हाम्रो प्रदर्शनमा सुधार गर्न सोचेभन्दा लामो लाग्यो,’’ बार्सिलोनाका प्रशिक्षक जाभीले भने, ‘‘यहाँ ला लिगा, कोपा डेल रे, सुपर कोपा जस्ता अन्य प्रतियोगिता पनि छन् । त्यसमा पनि हामीले जोड दिनुपर्छ, दृढ रहनुपर्छ र विश्वास गर्नुपर्छ । घरेलु मैदानमा यत्रो समर्थकमाझ यो वातावरणमा पनि हामीले बराबरी खेल्ने मेरो गल्ती हो । म क्रोधित छु । यस प्रतियोगिता हाम्रो लागि अझै निर्दयी बन्यो ।’’
बार्सिलोनाले च्याम्पियन्स लिगको समूह चरणमा अब बायर्न म्युनिखसँग घरमा र भिक्टोरिया प्लाजेनसँग अवे खेल खेल्नेछ । बार्सिलोनाले अब दुवै खेल जितेर मात्र पुग्दैन । इन्टर मिलानले पनि बायर्न र भिक्टोरिया प्लाजेनसँग अंक बाड्नुपर्छ । अनिमात्र बार्सिलोनाको सम्भावना हुन्छ ।
समूह ‘सी’मा बायर्न १२ अंकका साथ शीर्ष स्थानमा छ । बायर्नले अन्तिम–१६ मा स्थान पक्का गरिसकेको छ । इन्टर ७ अंकका साथ दोस्रो स्थानमा छ भने बार्सिलोना ४ अंकका साथ तेस्रो स्थानमा छ । भिक्टोरिया प्लाजेन अंकविहीन छ । बायर्नले गएराति भिक्टोरिया प्लाजेनलाई ४–२ ले हराएको थियो ।
