कांग्रेसको प्रश्न: तीन प्रतिवेदन कहिले सार्वजनिक र कार्यान्वयन हुन्छन् ?
कोल्हवी न्यूज
नेपाली कांग्रेसले विभिन्न घटनासँग सम्बन्धित तीन वटा प्रतिवेदनको कार्यान्वयन र सार्वजनिकरणबारे सरकारसँग स्पष्ट जवाफ माग गरेको छ।
शुक्रबार बसेको प्रतिनिधिसभा बैठकमा आकस्मिक समय लिएर बोल्दै कांग्रेस सांसद भरत बहादुर खड्का ले गत भदौ २३ गतेको घटनामाथि छानबिन भए पनि त्यसपछिको भदौ २४ गतेको घटनाबारे छानबिन प्रक्रिया किन अघि नबढेको भन्दै प्रश्न उठाए।
उनले उक्त घटनाबारे राष्ट्रिय मानव अधिकार आयोग ले समेत अनुसन्धान गरी प्रतिवेदन तयार गरिसकेको उल्लेख गर्दै सो प्रतिवेदन कहिले कार्यान्वयनमा ल्याइन्छ भनेर सरकारसँग जवाफ माग गरे।
सांसद खड्काले आयोगको प्रतिवेदनमा प्रभावशाली राजनीतिक व्यक्तित्व तथा सांसदहरूको नामसमेत समेटिएको दाबी गर्दै दोषीमाथि कारबाहीको प्रक्रिया कहिले सुरु हुन्छ भन्ने जिज्ञासा व्यक्त गरे। उनले कारागार जलाउने घटनासँग जोडिएका व्यक्तिहरूको विषय पनि प्रतिवेदनमा उल्लेख भएको स्मरण गराए।
त्यस्तै, सरकारले आफ्नो सयबुँदे कार्ययोजनामा भदौ २४ को घटनाको छानबिनका लागि छुट्टै आयोग गठन गर्ने उल्लेख गरेको भए पनि हालसम्म आयोग गठन नभएको भन्दै उनले त्यसबारे पनि स्पष्टीकरण माग गरे।
सांसद खड्काले गृहमन्त्री सुधन गुरुङ को सम्पत्ति र अन्य विषयमा उठेका प्रश्नबारे गठित समितिले प्रतिवेदन बुझाइसकेको चर्चा भए पनि उक्त प्रतिवेदन सार्वजनिक नगरिएको भन्दै असन्तुष्टि जनाए। उनले प्रतिवेदन सार्वजनिक नगरी पुनः गुरुङलाई गृहमन्त्री नियुक्त गरिएको उल्लेख गर्दै प्रतिवेदन सार्वजनिक गर्ने समयसीमाबारे सरकारको धारणा माग गरे।
प्रतिनिधिसभामा उठाइएका यी प्रश्नहरूले सरकारको जवाफदेहिता र विभिन्न छानबिन प्रतिवेदनहरूको कार्यान्वयन अवस्थाबारे पुनः बहस सुरु गराएको छ।
