राष्ट्रिय स्वतन्त्र पार्टी पर्सामा विस्तार हुँदै, तर आन्तरिक विवाद पनि चुलिँदै
कोल्हवी न्यूज
राष्ट्रिय स्वतन्त्र पार्टी (रास्वपा) ले पर्सामा सञ्चालन गरिरहेको संगठन विस्तार अभियानमा मधेश प्रदेशका विभिन्न जिल्लाबाट उल्लेखनीय आकर्षण देखिएको छ। तर, आकर्षणसँगै पार्टीभित्र आन्तरिक किचलो, विवाद तथा गुटगत गतिविधि पनि बढ्दै गएको संकेत देखिएको छ।
पार्टीभित्र नयाँ र पुराना नेताबीच विवाद र शक्ति संघर्ष चुलिँदै गएको नेताहरूले बताएका छन्। आगामी प्रदेश तथा स्थानीय तहको निर्वाचनलाई लक्षित गर्दै धेरै नेताहरू रास्वपालाई पहिलो रोजाइको पार्टीका रूपमा अघि बढाउन सक्रिय देखिए पनि त्यसले संगठन विस्तारमा चुनौती थपिएको बताइएको छ।
पर्सामा नेतृत्व र वर्चस्वको प्रतिस्पर्धा बढ्दै जाँदा आधा दर्जनभन्दा बढी समूह सक्रिय बनेका छन्। देशभर संगठन सुदृढीकरण अभियानअन्तर्गत सदस्यता वितरण, वडा भेला तथा वडा अधिवेशन सञ्चालन भइरहे पनि पर्सामा अभियान अपेक्षित रूपमा एकीकृत ढङ्गले अघि बढ्न नसकेको आरोप लागेको छ।
पार्टी नेताहरूबीच समन्वय अभाव र गुटगत राजनीति बढेका कारण वडा तहसम्मका कार्यक्रम प्रभावित भएको बताइएको छ। टिकटका आकांक्षी धेरै भए पनि संगठन विस्तार कार्यक्रममा सहभागिता अपेक्षाकृत न्यून देखिएको छ।
यसैबीच, पर्सा निर्वाचन क्षेत्र नं. ४ का क्षेत्रीय सभापति जितेन्द्र मिश्र र जिल्ला नेता कृष्ण पासवान सवार गाडीमाथि आक्रमण भएको छ। पर्साको एक कार्यक्रमबाट वीरगंज फर्किने क्रममा कालिकामाई गाउँपालिका वडा नं. १ स्थित मुडली पुल नजिक अज्ञात समूहले गाडीमाथि आक्रमण गरेको बताइएको छ।
इलाका प्रहरी कार्यालय पोखरियाका अनुसार घटनामा संलग्न व्यक्तिहरूको पहिचान खुले पनि उनीहरू फरार रहेकाले पक्राउ हुन सकेका छैनन्। सभापति मिश्रले आफूलाई हत्या गर्ने उद्देश्यसहित आक्रमण गरिएको भन्दै प्रहरीलाई जानकारी दिएका छन्।
उता, पर्सामा भइरहेका गतिविधिबारे पार्टीका सभापति तथा सांसद हरि पन्तले हालसम्म कुनै आधिकारिक प्रतिक्रिया दिएका छैनन्। आगामी स्थानीय निर्वाचनमा वीरगंज महानगरपालिकाको मेयर पदका लागि रास्वपाबाट उम्मेदवारी दिने दाबी गर्दै करिब दुई दर्जन नेता सक्रिय देखिएका छन्।
सम्बन्धित खबरहरु
