कांग्रेस कर्णालीद्वारा ‘दश बुँदे सूत्र’ जारी, १५औँ महाधिवेशनलाई एकताको महाधिवेशन बनाउने प्रस्ताव
कोल्हवी न्यूज
नेपाली कांग्रेस को नेपाली कांग्रेस कर्णाली प्रदेश कार्यसमिति ले पार्टीको बृहत्तर एकता र भावी कार्यदिशालाई केन्द्रमा राख्दै ‘दश बुँदे सूत्र’ सार्वजनिक गरेको छ।
वीरेन्द्रनगर मा शनिबारदेखि सुरु भएर आइतबार सम्पन्न ‘बृहत्तर एकता तथा भावी कार्यदिशा’ विषयक विचार गोष्ठीपछि उक्त सूत्र जारी गरिएको हो।
जारी सूत्रको पहिलो बुँदामा कांग्रेसको १५औँ महाधिवेशनलाई एकताको महाधिवेशनका रूपमा सम्पन्न गर्नुपर्ने उल्लेख गरिएको छ। यस्तै, केन्द्रीय अनुशासन समितिमार्फत विभिन्न नेता–कार्यकर्तामाथि गरिएका कारबाही र मागिएका स्पष्टीकरण फिर्ता लिएर पार्टीभित्र एकताको वातावरण बनाउनुपर्ने माग पनि गरिएको छ।
सूत्रमा पार्टीका सबै तहमा २५ प्रतिशत युवा प्रतिनिधित्व सुनिश्चित गर्नुपर्ने, समावेशी सिद्धान्तलाई अझ प्रभावकारी रूपमा लागू गर्नुपर्ने तथा प्रविधिमैत्री संगठन निर्माणमा जोड दिइएको छ।
त्यस्तै नेपालको सार्वभौमसत्ता, स्वतन्त्रता र भूराजनीतिक संवेदनशीलताप्रति परिपक्व साझा दृष्टिकोण बनाउनुपर्ने विषयलाई पनि प्राथमिकतामा राखिएको छ। लोकतान्त्रिक व्यवस्था र सङ्घीय शासन प्रणालीको संरक्षण तथा प्रवर्द्धनका लागि कांग्रेस नेतृत्वमा लोकतान्त्रिक शक्तिहरूबीच साझा संयन्त्र निर्माण गर्नुपर्ने उल्लेख गरिएको छ।
महँगीबाट प्रभावित जनतालाई राहत उपलब्ध गराउने, ट्रेड युनियन अधिकार सुनिश्चित गर्ने, प्राकृतिक विपद्बाट नागरिकको सुरक्षा गर्ने तथा संसद्मा जिम्मेवार प्रतिपक्षीको भूमिका निर्वाह गर्नुपर्ने विषय पनि सूत्रमा समेटिएको छ।
यस्तै, आगामी आर्थिक वर्ष २०८३/८४ को बजेट तथा कार्यक्रममा कर्णालीको विकासका लागि विशेष व्यवस्था गर्न सरकारसँग आवश्यक पहल र समन्वय गर्न केन्द्रीय नेतृत्वलाई आग्रह गरिएको ललितजङ्ग शाही ले जानकारी दिए।
सम्बन्धित खबरहरु
