संघीय लोकतान्त्रिक मोर्चामा संकट: असन्तुष्टि, असहमति र निष्क्रियता हावी
कोल्हवी न्यूज
तराई–मधेस केन्द्रित दलहरूको सहकार्यबाट बनेको संघीय लोकतान्त्रिक मोर्चा यतिबेला आन्तरिक विवाद र निष्क्रियताका कारण कमजोर बन्दै गएको देखिएको छ। नेतृत्व महन्थ ठाकुर ले सम्हालिरहेका भए पनि सहभागी दलहरूबीच समन्वय अभाव बढ्दो छ।
मोर्चाका बैठकहरू औपचारिक रूपमा बस्दै आए पनि शीर्ष नेताहरूको सहभागिता न्यून हुँदै गएको छ। विशेषगरी उपेन्द्र यादव नेतृत्वको दलका उच्च तहका नेताहरू बैठकमा अनुपस्थित रहने क्रम बढेको बताइन्छ। अन्य दलहरू पनि अपेक्षित रूपमा सक्रिय देखिएका छैनन्।
यसैबीच रेशम चौधरी संरक्षक रहेको नागरिक उन्मुक्ति पार्टी मोर्चाबाट व्यवहारिक रूपमा टाढिँदै गएको संकेत देखिएको छ। चौधरीले औपचारिक रूपमा अलग नभएको बताए पनि मोर्चाको कार्यशैलीप्रति असन्तुष्टि जनाउँदै यसमा बसिरहनुको औचित्य नरहेको बताएका छन्।
मोर्चाभित्र पार्टी एकता प्रक्रियामा पनि गम्भीर मतभेद देखिएको छ। केही नेताहरू तत्काल एकता टुंग्याउनुपर्ने पक्षमा छन् भने जनता समाजवादी पार्टी नेपाल र लोकतान्त्रिक समाजवादी पार्टी नेपाल बीचको एकता नै अधुरो रहेकाले अन्य दलसँग अघि बढ्न नसकिने मत पनि बलियो छ।
हालैको बैठकमा नयाँ पार्टी गठनको प्रारूप प्रस्तुत गरिए पनि त्यसले ठोस दिशा लिन सकेको छैन। प्रस्तावित संरचनामा पुराना अध्यक्षहरूलाई नेतृत्वबाट बाहिर राख्ने विषय उठेपछि विवाद झन् चर्किएको छ।
मोर्चाका नेताहरू नै नेतृत्व र कार्यदिशामा स्पष्टता अभाव रहेको स्वीकार गर्छन्। यही कारण मोर्चा प्रभावहीन बन्दै गएको विश्लेषण गरिएको छ। अब एकता गर्ने कि अलग हुने भन्ने निर्णायक मोडमा मोर्चा पुगेको उनीहरूको भनाइ छ।
राजनीतिक विश्लेषकहरूका अनुसार साझा मुद्दाभन्दा नेतृत्वको रस्साकस्सी हावी हुँदा मोर्चाको भविष्य अन्योलमा परेको देखिन्छ।
