हृदयाघातअघि सबैमा एउटै लक्षण देखिँदैन, यी संकेत देखिए सतर्क हुन चिकित्सकको सुझाव

काठमाडौं । पछिल्ला वर्षहरूमा हृदयाघात (हार्ट अट्याक) विश्वभरि नै गम्भीर स्वास्थ्य समस्याका रूपमा बढ्दै गएको छ। धेरै मानिसमा हृदयाघात अचानक हुने भए पनि केही व्यक्तिमा भने त्यसअघि शरीरले विभिन्न चेतावनीमूलक संकेत दिन सक्ने चिकित्सकहरू बताउँछन्।

विशेषज्ञहरूका अनुसार हृदयाघात हुनुभन्दा ठीक १४ दिनअघि नै सबै व्यक्तिमा एउटै प्रकारका लक्षण देखिन्छन् भन्ने धारणा सही होइन। कसैमा प्रारम्भिक संकेत देखिन सक्छ भने कतिपयमा कुनै स्पष्ट चेतावनीबिना पनि हृदयाघात हुन सक्छ।

हृदयाघातको सबैभन्दा सामान्य लक्षण छातीमा दुखाइ, भारीपन, दबाब वा पोल्ने अनुभूति हो। यस्तो समस्या केही मिनेटसम्म रहन सक्छ वा पटक–पटक दोहोरिन सक्छ। आराम गर्दा पनि सुधार नआए तुरुन्त अस्पताल जान चिकित्सकहरूले सुझाव दिएका छन्।

यस्तै, कुनै विशेष मेहनत नगर्दासमेत सास फेर्न गाह्रो हुनु, सामान्य हिँडडुल वा सिँढी चढ्दा अत्यधिक सास फुल्नु पनि मुटुसम्बन्धी समस्याको संकेत हुन सक्छ।

लगातार असामान्य थकान, कमजोरी वा ऊर्जा अभाव महसुस हुनु अर्को महत्वपूर्ण लक्षण हो। यो समस्या विशेष गरी महिलाहरूमा बढी देखिन सक्ने चिकित्सकहरूको भनाइ छ।

हृदयाघातको पीडा छातीमा मात्र सीमित नहुने उनीहरू बताउँछन्। बायाँ वा दुवै हात, काँध, घाँटी, ढाड, बङ्गारा तथा पेटको माथिल्लो भागसम्म पनि पीडा फैलिन सक्छ।

त्यस्तै, अचानक चिसो पसिना आउने, वाकवाकी लाग्ने, चक्कर आउने वा बान्ता हुनेजस्ता लक्षण पनि केही व्यक्तिमा देखिन सक्छन्। छाती दुखाइसँगै यस्ता समस्या देखिए तत्काल चिकित्सकीय सहायता लिनु आवश्यक हुन्छ।

कतिपय व्यक्तिले हृदयाघातअघि असामान्य बेचैनी वा केही अनिष्ट हुन लागेको जस्तो अनुभूति पनि गर्न सक्छन्। यद्यपि, यो मात्र हृदयाघातको निश्चित संकेत नभए पनि अन्य लक्षणसँगै देखिएमा बेवास्ता गर्नु हुँदैन।

विशेषज्ञहरूले हृदयाघातको जोखिम कम गर्न सन्तुलित आहार, नियमित व्यायाम, धूम्रपान तथा सुर्तीजन्य पदार्थबाट टाढा रहने, रक्तचाप, रगतमा चिनी र कोलेस्ट्रोलको नियमित परीक्षण गर्ने तथा पर्याप्त निद्रा र तनाव व्यवस्थापनमा ध्यान दिन आग्रह गरेका छन्।एजेन्सी