मोहम्मद दिवसको उल्लास, धार्मिक आस्था र सामाजिक सद्भावमा जोड
कोल्हवी न्यूज
हजरत मोहम्मद पैगम्बरको जन्मदिनको अवसरमा बुधबार देशभर मुस्लिम समुदायले मोहम्मद दिवस मनाउँदै छन्। दिवसका अवसरमा विभिन्न स्थानमा धार्मिक कार्यक्रम, कुरान पाठ, प्रवचन तथा प्रार्थनालगायत कार्यक्रम आयोजना भइरहेका छन्।
मुस्लिम समुदायका लागि महत्वपूर्ण धार्मिक दिवसका रूपमा मनाइने मोहम्मद दिवसमा हजरत मोहम्मदले दिएको शान्ति, मानवता, भाइचारा, परोपकार र सदाचारको सन्देश स्मरण गर्ने गरिन्छ। धार्मिक अगुवाहरूले दिवसलाई धार्मिक आस्थासँगै सामाजिक एकता र सद्भाव कायम गर्ने अवसरका रूपमा लिएका छन्।
दिवसका अवसरमा मस्जिद तथा मदरसामा विशेष कार्यक्रम आयोजना गरिएको छ। विभिन्न स्थानमा मुस्लिम समुदायका मानिसहरू धार्मिक पोसाकमा सहभागी हुँदै एकअर्कामा शुभकामना आदानप्रदान गरिरहेका छन्।
नेपालगन्जसहित मुस्लिम समुदायको उल्लेख्य बसोबास रहेका क्षेत्रमा दिवसको विशेष चहलपहल देखिएको छ। विभिन्न समुदायका मानिसहरूले पनि मुस्लिम समुदायलाई शुभकामना दिँदै दिवसमा सहभागिता जनाएका छन्।
स्थानीयहरूका अनुसार फरक धर्म र संस्कार भए पनि एकअर्काका चाडपर्वमा सहभागी भएर खुसी साटासाट गर्ने परम्पराले धार्मिक सहिष्णुता र आपसी सम्बन्धलाई बलियो बनाएको छ।
यसैबीच, धार्मिक कार्यक्रमलाई मर्यादित र शान्तिपूर्ण बनाउन विभिन्न स्थानमा विशेष ध्यान दिइएको छ। नेपालगन्जमा यसपटक धार्मिक कार्यक्रम तथा जुलुसमा चर्को ध्वनि आउने गरी डिजे नबजाउने निर्णय गरिएको मुस्लिम समुदायका अगुवा अतहर हुसेन फारुकीले बताए।
मोहम्मद दिवसका अवसरमा देशभर देखिएको धार्मिक गतिविधि, शुभकामना आदानप्रदान र विभिन्न समुदायको सहभागिताले नेपालमा धार्मिक सहिष्णुता, भाइचारा र सामाजिक सद्भावको सन्देश दिएको छ।
